Familja Sefaj ka nxjerrë bagëtitë nga bunkeri, për t'i gjetur një strehë vetes. Humbën një të afërm dhe shtëpinë.

Familja Sefaj ka nxjerrë bagëtitë nga bunkeri, për t'i gjetur një strehë vetes. Humbën një të afërm dhe shtëpinë

Banorët, mes etheve të dëmshpërblimit të vonuar dhe frikës nga zona e infektuar e shpërthimit

TIRANË- Ka nxjerrë lopën nga "shtëpia" dhe ka hyrë vetë brenda. Një bunker i vjetër, gjysmë i shkatërruar e ku ende ndjehet era e bagëtive, është kthyer në banesën e familjes Sefaj në Gërdec. Shpërthimi i 15 marsit i ka lënë në qiell të hapur dhe në mëshirë të fatit. E vetmja që i ndihmoi ishte lopa e tyre, pasi shteti u ka thënë të presin deri kur të bëhen letrat për të marrë dëmshpërblimin. "E pse të mos qeshë në gjykatë Delijorgji, me gjithë gjëmën që na shkaktoi. Të gjitha i vuajmë ne. Vajza më vdiq për 10 mijë lekë të vjetra, pa shtëpi e katandi kam mbetur. Kemi rreth një muaj që flemë në bunker dhe nuk e dimë sa kohë do të qëndrojmë kështu", -nis rrëfimin nëna e Nafie Lacit, e cila humbi jetën në tragjedinë e Gërdecit. Për të moshuarën nuk ka rëndësi nëse dënohet apo jo Delijorgji, ai nuk do t'ia kthejë sërish të bijën. Por ajo kërkon që shteti të mbajë përgjegjësitë e veta dhe t'i kthejë sytë nga ata, viktimat e shpërthimit të 15 marsit.

Një bunker- shtëpi

Më parë, bunkeri i madh u shërbente për të mbajtur bagëtitë, ndërsa tanimë e kanë kthyer në shtëpi për vete. "Djemtë e mi punuan me vite të tëra në emigracion. Ata e dinë sa kanë vuajtur për të ndërtuar këtë shtëpi, nga e cila tani nuk ka mbetur më asgjë",- tregon kryefamiljarja Sefaj, e cila qëndron me bashkëshortin e saj në bunker. Djemtë dhe nuset e tyre kanë marrë shtëpi me qira në Vorë, ndërsa dy të moshuarit nuk kanë pranuar të largohen nga rrënojat e shtëpisë. E moshuara mblodhi të gjitha mobiljet që u kishin shpëtuar shkatërrimit dhe i ka sistemuar brenda në bunkerin e madh. "Nuk kam ku të shkoj, do të vazhdoj të qëndroj në këtë bunker pa dritë. Më duhet të ruaj shtëpinë nga hajdutët që vijnë dhe marrin dritare, dyer, dhe mobilje të tjera",- tregon më tej e moshuara. Të gjithë në këtë familje janë pa punë, por iu duhet të paguajnë qiranë e të sigurojnë bukën e gojës. Deri më tani po mbajnë frymën gjallë medy milionë lekët e vjetra që u dha shteti pak ditë pas tragjedisë, por edhe atyre po u del fundi. Familja Sefi nuk është e vetmja që ruan gërmadhat e shtëpisë. Janë me dhjetëra familje të tjera në fshatin Gërdec e Marqinet, që gdhihen e ngrysen në çadra. Këto të fundit iu dhuruan këtyre familjeve për t'u strehuar deri në rindërtimin e shtëpive.

Një ditë prapë në shtëpi

Për ta, duket shumë e largët dita kur do të flenë në shtëpitë e tyre. Edhe pak ditë dhe bëhet një muaj nga tragjedia e Gërdeci, por banorët vazhdojnë të strehohen ku të mundin. Ende nuk kanë marrë paratë nga shteti, ende nuk është dhënë konfirmimi për të filluar punimet e shtëpive. Deri atëherë, iu duhet të qëndrojnë në çadra dhe bunkerë. Banorët e zonës pranë kraterit nuk dinë të thonë nëse do rindërtojnë shtëpinë mbi gërmadha. "Amerikanët na thanë se zona është e helmuar dhe është shpallur e pabanueshme. Toka nuk është më prodhuese dhe helmi mund të na kushtojë jetën në të ardhmen. Por këtu kemi pronat, nuk e dimë nëse do të jetojmë më këtu apo jo. Për ata banorë që kanë humbur familjarët e tyre në atë fabrikë, është e pamundur të vazhdojnë të jetojnë në Gërdec. Para syve kanë vendin që u mori jetën të dashurve të tyre. Unë e kam përballë vendin ku ndodhej fabrika ku mbeti e vrarë motra ime, nuk mund ta shoh më atë vend. Nuk e di çdo të ndodhë në të ardhmen", -u shpreh për shekullin Haki Sefaj. Vëllezërit e tij, gjysmën e jetës e kaluan duke punuar për të ndërtuar atë shtëpi, që një tërmet i shkaktuar nga njerëzit, ua shkatërroi.

NDOTJA

Ushtarët rrethojnë zonën e infektuar

Komente

Shto Koment Kerko Komentet

Shkruaj nje Koment
Emri Juaj:
Email(opsional):
Titulli:
	Jepni kodin e sigurise qe shikoni ne imazh.

Powered by !JoomlaComment 3.21

3.21 Copyright (C) 2007 Alain Georgette / Copyright (C) 2006 Frantisek Hliva. All rights reserved."