"Antidota më e mirë kundër zbrazëtisë dhe mërzitjes. Libri", quhej ceremonia e dorëzimit të librave nga 7 shtëpi botuese, Drejtorisë së Përgjithshme të Burgjeve. Ishte ceremoni mediatike, në qendër të Tiranës, me një koktejil ku shërbehej edhe verë. Destinatorët e këtyre librave, të burgosurit, do të kishin qenë vërtetë të gëzuar sikur të ishin pjesëmarrës në këtë ceremoni, për t'u ndier ashtu "të integruar" siç pretendohet nga shoqatat që propagandojnë dhe mbikëqyrin gjendjen e të drejtave të njeriut edhe në burgjet shqiptare. Por… mjafton mendimi i mirë. Shtëpitë Botuese, "Max", "Scanderbeg books", "Ombra GVG", "Toena", "Gjergj Fishta" dhe "Dita 2000" kanë dhuruar libra përata që vuajnë dënimin në burgjet e Shqipërisë. Nuk mund të thuash që janë titujt më të fundit të shtëpive botuese, megjithatë për të izoluarit, çdo gjë që hyn brenda katër mureve mund të duket e re. Edhe vetë Avokati i Popullit, Emir Dobjani, thotë se për këtë rast u është bërë thirrje shtëpive botuese që nga fondet dhe nga magazinat e tyre të nxjerrin të paktën edhe "ata libra që konsiderohen edhe si të pashitshëm". Kjo është sipas Dobjanit një iniciativë e nisur para një viti kur Komiteti i Helsinkit në bashkëpunim me Avokatin e Popullit organizoi mbledhjen e librave për bibliotekën e Drejtorisë së Përgjithshme të Burgjeve, por në të vërtetë ka qenë Shtëpia Botuese "Max" që dy vjet para ka dhuruar libra për burgun e grave në Tiranë.

Megjithatë, pavarësisht se ku është zanafilla, kjo është vërtet një iniciativë për t'u lavdëruar. Që libri është një mik i mirë, që mbush zbrazëtitë dhe heq mërzitjen, kjo tashmë dihet. U ndodh të gjithëve e aq më tepër, libri është një mik për ata që kanë kohë bosh me shumicë, si në rastin e të burgosurve. Një studim se çfarë ndikimi ka libri në jetën e një të dënuari, se ku qëndron ndryshimi mes një të burgosuri që lexon dhe një tjetri që nuk i kushton kohë leximit, nuk është bërë.

Një psikologe e burgjeve në Tiranë, ishte tepër e druajtur për të folur për këtë çështje me mediat, por sigurisht profesioni nuk ia lejon që të jetë e tillë edhe në komunikimin me të burgosurit (!)

Aktualisht ia vlen të shënohet që nuk ka as ndonjë sondazh mbi lexueshmërinë në burgje, megjithatë koordinatorja e këtij projekti, Deniola Shkëmbi, thotë se interesi ndaj librit vjen në rritje. "Duke iu referuar kërkesave të institucioneve që lidhen me drejtorinë e burgjeve rezulton se shumë të burgosur janë të interesuar për librin", - thotë ajo, ndërsa shton se në varësi të kërkesave është bërë edhe përzgjedhja e titujve, në mënyrë që t'i përshtaten minorenëve në kushtet e paraburgimit, apo burgimit, grave e të interesuarve të tjerë. Për shembull, në vitin 2006, gjatë një dhurimi librash në burgun e grave nga shtëpia botuese "Max" u vu re se librat që preferoheshin më shumë ishin ata sociologjikë, librat që lidheshin me kulinarinë, por edhe romanet rozë, jo shumë impenjativë. Ndër titujt e ekspozuar në stendat e bamirësve mund të përmendim "Zonja pa emër", "Vajza e doktorit", "Udhëtari i natës", "Letër Bonapartit", "Trupi i njeriut", "Burrat e vërtetë nuk thonë kurrë më fal", etj.

Komente

Shto Koment Kerko Komentet

Shkruaj nje Koment
Emri Juaj:
Email(opsional):
Titulli:
	Jepni kodin e sigurise qe shikoni ne imazh.

Powered by !JoomlaComment 3.21

3.21 Copyright (C) 2007 Alain Georgette / Copyright (C) 2006 Frantisek Hliva. All rights reserved."