Jo çdo artist mund të marrë pjesë në audicionet operistike. Më parë ata duhet të kalojnë në axhendën e drejtorisë artistike e cila jashtë çdo kriteri a rregulloreje, garën po e fsheh pas dyerve të mbyllura.

Edhe pas kthimit mbrapsht të draft-propozimit për reformën në institucionet e artit skenik, gjendja vazhdon të jetë e paqartë në Teatrin Kombëtar të Operës dhe Baletit. Më shumë se asnjëherë tjetër artistët ndihen të çensuruar. Nëse je shprehur kundër draft-reformës, apo je sindikalist, nuk ke të drejtë të interpretosh një rol në një vepër operistike. Sigurisht, këto arsye nuk thuhen hapur, edhe pse të gjithë e dinë se kështu është. Është rasti i tenorit Rudin Sata, i cili megjithëse prej kohësh po përgatitej për rolin e Manrikos tek opera verdiane "Trovatore", nuk u pranua as në audicion. Si "rastësisht" Sata është një nga ata që është shprehur hapur kundër bordit të TKOB-it dhe reformës së propozuar nga Ministria e Turizmit, Kulturës, Rinisë dhe Sporteve. Dhe ky refuzim të çon të mendosh pikërisht këtë: Sata u ka shkelur disa personave në kallo. Në këtë mes nuk diskutohet niveli artistik dhe aftësitë vokale të Satës, se kjo është tjetër çështje. Ajo që nuk bind askënd është arsyeja e refuzimit.

Instanca që vendos për rolet dhe artistët që duhet të interpretojnë apo jo është drejtoria artistike e cila tashmë drejtohet nga Kujtim Vorpsi, një nga instrumentistët e njohur dhe me peshë në orkestën e TKOB-it. Mësohet se Sata, ashtu si edhe shumë të tjerë, i ka dërguar kërkesë me shkrim Vorpsit ku i kërkon të marrë pjesë në audicionet që do të zhvillohen për rolin e Manrikos. Kërkesë që i është refuzuar. Sipas drejtorit artistik Vorpsi, Sata nuk ishte në "axhendën" e tij. Kjo është përgjigjja që i është dhënë artistit, por edhe gazetës "Shekulli", kur u pyet për këtë rast.

"Unë e kam sqaruar edhe më parë. Ai është jashtë axhendës sime", - thotë Vorpsi. Sipas tij, kjo do të thotë se roli i Manrikos është specifik dhe se jo kushdo mund të marrë pjesë në audicion. "Përpara se të marrë pjesë në audicion duhet të hyjë në axhendën e drejtorisë artistike", - thotë Vorpsi, i cili nuk e quan ndonjë çështje aq të rëndësishme për tu diskutuar, në një kohë kur TKOB-i ka probleme më të mëdha se kaq.

Sa mësojmë nga vetë artistët, deri më sot, audicionet kanë qenë të hapura. Në to mund të merrnin pjesë jo vetëm të punësuarit në opera, por edhe artistë të rinj që vazhdojnë studimet apo që i kanë përfunduar dhe aspirojnë që të këndojnë në opera. Në praktikën e punës së TKOB-it, kishte një kalendar shfaqjesh dhe një kalendar audicionesh për rolet e veprave të sezonit, po edhe për korin. Veç datave, nuk kishte emra konkretë të pjesëmarrësve në audicion. Ndërsa tani duket se nuk është kaq e thjeshtë. Më parë duhet të hysh në "axhendën e drejtorit artistik".

Mësohet se kërkesa për të marrë pjesë në audicion i është refuzuar edhe sopranos Sofika Kola. Pra nuk kemi të bëjmë me një rast të veçuar.

Për shembull në koncertin e organizuar me rastin e vitit të Puccinit, në program parashikohej edhe një arie nga opera "Turandot". Edhe pse ishte e mundur nuk u pranua që sopranoja e sëmurë Irini Nikolla të zëvendësohej nga sopranoja Edit Mihali e cila ka kënduar pikërisht këtë rol në skenën e TKOB-it. Kjo situatë ka sjellë jo pak shqetësime mes artistësh, madje për këtë arsye thuhet që të jenë ndërprerë edhe provat. Ka qenë baritoni Ylber Gjini që ka protestuar mosmarrjen në vepër të tenorit Rudin Sata.

Është vendosur ndërkaq që roli i Manrikos të ketë vetëm një këngëtar përgjatë katër netëve dhe që do të interpretohet nga tenori Agim Hushi. Gjë e rrallë që ndodh në rastet emergjencash kur rolet kryesore janë interpretuar vetëm nga një këngëtar. Gjithnjë ka qenë një dublant a më saktë një solist tjetër me të cilin janë ndarë netët e shfaqjes.

Nga ana e drejtorisë së përgjithshme nuk ka ndonjë reagim, ndoshta deri në momentin kur të marrin një përgjigje nga Ministria e Turizmit, Kulturës, Rinisë dhe Sporteve për reformën, statusin e institucionit, por mbi të gjitha, për kompetencat e çdo strukture. Në peticionin që iu dërgua MTKRS-së kërkohej "zgjidhja në mënyrë urgjente e problemit të emërimeve jo profesionale në strukturën drejtuese të institucionit (posti i drejtorit të produksionit skenik dhe atij të nëndrejtorit-drejtor ekonomik)".

Komente

Shto Koment Kerko Komentet

Shkruaj nje Koment
Emri Juaj:
Email(opsional):
Titulli:
	Jepni kodin e sigurise qe shikoni ne imazh.

Powered by !JoomlaComment 3.21

3.21 Copyright (C) 2007 Alain Georgette / Copyright (C) 2006 Frantisek Hliva. All rights reserved."