|
AGPK-ja kundėr tendencės sė Qeverisė pėr kontroll mbi mjetet e informacionit |
|
|
|
Saturday, 03 May 2008 |
|
Asociacioni i Gazetarëve Profesionistë të Kosovës ka ngritur shqetësimin e tij për gjendjen e mediave në Kosovë dhe për tendencën e Qeverisë për kontroll mbi mjetet e informacionit, gjatë një tryeze të mbajtur me rastin e Ditës Botërore të Lirisë së Shtypit, në të cilën kanë marrë pjesë drejtuesit e mediave kryesore në vend, përfshirë edhe përfaqësuesit e mediave serbe.
Në një komunikatë, AGPK ka shprehur shqetësimin e saj për gjendjen e gazetarëve të cilët vazhdojnë të jenë të kërcënuar në ushtrimin e profesionit të tyre. Ky asociacion ka kërkuar nga organet e rendit dhe sigurisë që ta kuptojnë drejt punën e gazetarëve dhe që të marrin masa ndaj atyre që e pengojnë fjalën e lirë.
AGPK është e shqetësuar posaçërisht për raportet e krijuara të Qeverisë së Kosovës dhe institucioneve tjera me mediat. Mosemërimi i një zëdhënësi që do të ishte në shërbim të gazetarëve për 24 orë dhe kufizimi i qasjes së gazetarëve në informacion në vetëm një orë në ditë si rast i paprecedent në vendet demokratike, sipas AGPK-së, tregon rrugën e gabuar që kanë zgjedhur institucionet në marrëdhëniet me mediat.
Ky raport, sipas këtij asociacioni, ilustrohet më së miri me mospraninë e politikanëve të ftuar në tryezën e organizuar nga AGPK dhe UNKT, presidentit Sejdiu dhe kryeministrit Thaci, të cilët kanë injoruar shënimin e Ditës Botërore të Lirisë së Shtypit. “Injorimi dhe papërgjegjësia e treguar nga udhëheqësit e lartë të institucioneve është turpi i radhës”, ka vlerësuar AGPK-ja.
|
